兵工廠要埋“素”
英超一向被公認為世界最高水準嘅聯賽之一,惜愛華頓輸埋畀基輔戴拿模後,今季參加歐戰嘅英超球隊遭到“滅門”,只可以閂埋門自己打自己。
阿仙奴在歐冠盃飲恨出局,唯有全力爭足總盃,並在聯賽最後衝刺。球隊近五場聯賽取得全勝,已經緊貼第二嘅曼城,更與榜首車路士只有七分之差,話多唔多,隨時冷手執個熱煎堆,爆埋個聯賽冠軍。當然,兵工廠餘下賽事必要連場報捷,今晚北上作客高不成、低不就嘅紐卡素,三分誓要非取不可。
球隊近期發揮相當出色,各項賽事取得五連勝,且每場最少攻入兩球,由基奧特、山齊士及韋碧克組成嘅三叉戟,開始漸見威力。今場對住防守力薄弱嘅紐卡素,阿仙奴勝算甚高。
紐卡素防線的確係最弱一環,廿九場聯賽共失四十六球,係英超失球最多三隊之一。且仲有一個經常出現嘅毛病,就係“一係唔失波,一失失好多。”初盤阿仙奴讓一球,兵工廠贏波應該問題不大,最緊要數多兩三球,一於博阿仙奴開大“素”。
推介:阿仙奴3:1
足球評述員 Ben
留言