巴塞仍未站穩腳
昨晨捱更抵夜睇場西甲榜首大戰,由巴塞羅那激戰皇家馬德里,呢場矚目大戰,相信唔少球迷都唔會錯過,戰況及激烈程度應該都令大部分球迷收貨,捱眼瞓都算值得。
比賽結果巴塞一雪前恥,以二比一擊敗死敵,報回首循環一敗之仇。正如賽前所料,勝負將取決於“MSN”南美三叉戟,與“BBC”歐洲三箭頭嘅發揮如何,結果南美幫以技術與狀態較佳完勝對手,贏得合情合理。
巴塞贏波後已領先皇馬四分,的確有奪標嘅優勢所在,但唔好忘記,聯賽仲有十輪賽事,呢四分只係“袋住先”,因為睇返餘下賽程,巴塞仍未坐定粒六,至少仲有三支實力派球隊未踢,包括主場對華倫西亞,及作客對西維爾與馬體會,呢三場關鍵之戰,唔排除有失分嘅可能性。
相反,皇馬所剩嘅對手唔算太強,只係主場對華倫西亞及作客西維爾較有風險,所以“銀河艦隊”絕對唔會放棄任何機會。三、四位嘅華倫西亞與馬體會依然死心不息,隨時可以搞亂大局,總之未到最後一刻,亦未知結局如何。
足球評述員 Ben
留言