剝削外勞  壓低工資  不良競爭

    李靜儀指政府濫輸勞

    財爺首度披甲上陣，與議員辯論施政方針，卻遇勞工界議員李靜儀火力全開，就外勞、收入分配等打工仔焦點話題力陳不是，句句到肉，“粗疏的外勞政策，令本地人喪失議價能力，越來越多行業工資水平受壓甚至就業不穩定，最後無奈離開行業，居民選擇就業嘅空間只會越收越窄。除咗莊荷同政府工，司長你覺得澳門人仲可以有幾多擇業空間？況且，澳門現時外勞超過十七萬，司長你可唔可以話畀澳門人知仲會嚟幾多呀？”

    收窄澳人就業空間

    議員區錦新首先批評濫輸外勞影響本地人議價能力，已影響到社會資源分配。李靜儀加入狙擊，指有大量外勞行業的員工，最能體會薪酬受壓抑、追不上通脹或社會發展的苦況。即使同為博企僱員，清潔、餐飲服務員、工程部等員工，因為容許大量輸入外勞，人工無法合理調升，與不准輸入外勞職位的薪酬差距越拉越大。政府審批粗疏，無總量、無比例、無工資指標、無退場機制，更無嚴格監管及懲罰措施，進一步形成外勞的廉價競爭。

    李靜儀怒斥，有幾個物業管理外勞投訴，一日做十六個小時，收入只有九千多元，實際收入低於人資辦批出的工資標準，僱主可以無良剋扣外勞至此。但關鍵係政府缺乏嚴厲處罰機制，政府實際上就係幫兇。惡果一，外勞受剝削，權益受損；惡果二，僱主能用低工資請外勞甚至剋扣，誰願意畀合理人工請本地人呢？本地人除非人工鬥平，否則一定輸，結果就形成本地人就業空間收窄、工資未能合理調升，勞動分配比例點會唔低？惡果三，其他合法經營依法聘請員工的企業，如何敵得過這些用剝削手段賺到盡的企業惡性競爭？今時今日的澳門，政府是否可以任由勤懇工作僱員、良心經營企業面對咁唔公平的環境？

    李靜儀稱：“我想幫我們澳門的打工仔講返句公道說話，好多人都話我們有些打工仔唔積極、唔努力，我想問司長，如果我們再努力落去，有甚麼行業可以讓我們努力的居民穩定有一份合理收入的工作呢？除了流向博彩業、流向政府工，我希望政府可以話到畀我們聽，我們還有甚麼空間？如果再放任外勞政策亂來，相信居民永遠都不能分享到經濟發展的成果。”

    斥財爺數據商為本

    面對議員炮轟，財爺列出一系列數據指居民有分享到經濟發展成果。李靜儀再發火：“你的答案切實以商為本，你似乎唔覺得澳門初次分配出了問題，喺你眼中原來打工仔已經完美地分享到經濟發展成果啦，於是你舉出咗咁多數據。我覺得政府唔好咁偏聽，你落區唔該聽打工仔意見。唔好用呢個角度、呢啲數字去催眠我們分享到經濟發展的成果。我根本唔知你點做這個分析，難怪人資辦現時咁批外勞，根本係濫輸、濫批。”

    本報記者  報道