支持本地足球
歐洲國家盃外圍賽經過一輪戰火後,呢兩日歐洲波交投比較淡靜,所以又係時候同各位波友吹吓水。
今日先講吓自己友澳門隊。早前代表隊踢世界盃亞洲區外圍賽,結果兩回合一比四輸畀柬埔寨。唔係潑冷水,被淘汰係意料中事,大家亦毋須要求過高,因為本地波嘅足球水平去到邊,各位心中有數。
其實首回合澳門作客輸三球,身邊有唔少波友嘅評價都係劣多個讚,甚至踩到自己友唔識踢波一樣,唉!咁又何必呢,始終澳門屬地區性,且仲係業餘階段,同足球發展中嘅地區相比,根本兩回事。但次回合再戰柬埔寨,球員嘅拼搏與鬥心,小弟一定畀個“讚”。
小弟並非擦鞋,只係有碗話碗。因為近呢一兩年睇到“波總”嘅動作,的確有心推動本地足球發展。唔單只澳門隊逐漸有規劃性進展,甚至本地女足亦有極大突破,能夠有機會參與國際賽實在相當難得。
當然,要本地足球一步登天又談何容易,最緊要係得到球圈所有人士嘅支持。希望“波總”繼續努力不懈,推動澳門足球。
足球評述員 Ben
留言