捧曼城等收“水”
英超三大派系,車仔,兵工廠與紅魔鬼前日齊齊贏波後,經已佔據前三甲位置,搞到老二嘅曼城跌落第四位,好彩係紅軍輸波,曼城暫時仍可保住歐冠席位。不過,做阿四又點會甘心,明晨作客水晶宮,藍月亮必會全副武裝出擊,誓要全取三分,搶回老二之位。
排第十二位嘅水晶宮距離降班線球隊有十一分,雖然未肯定上岸,但應該定過抬炸彈,可以專心去踢好每一場比賽。以球隊嘅人腳實力,明顯不及曼城,首循環亦全無還擊之力慘吞三蛋,今仗只望借助主場之利,但求與曼城一拼到底。初盤曼城讓半球/一球,火力強勁嘅藍月亮應可射爆水晶宮。
曼城對上一場作客竟然爆大冷,不敵排尾二嘅般尼,衛冕聯賽冠軍機會已經轉微。跟住歐冠盃又出局,教頭柏帥不但要保住英超前四位置,亦要爭取保住自己個飯碗。上場終於大發神威,不但三球大炒西布朗,更創出今季英超攻門次數最多一場比賽,四十三次射門十六中。只要今場繼續炮轟對手,要贏波絕對唔難。
推介:曼城2:0
足球評述員 Ben
留言