馬體會“蘇”Win
西甲勁旅馬德里體育會最近捷報頻傳,各項賽事取得三連勝外,亦得到中國大連某大集團入股,令呢支上季聯賽冠軍更加財雄勢大,預料未來兩三季絕對有力與兩大豪門巴塞及皇馬一較高下;當然,最緊要今季繼續保持佳績“交到貨”,至少穩住三甲位置。
“床單軍”目前在聯賽榜排第三,與榜首嘅巴塞相差九分,要衛冕的確唔容易,但相信絕對唔會放棄任何機會,明晨在卡達朗球場迎戰皇家蘇斯達,以主場超強嘅霸氣,要殺退對手應該問題不大。
皇蘇屬於一支硬骨頭球隊,整體實力比上不足比下有餘,惜球隊踢作客表現較走樣,十四場聯賽僅得一勝,兼且僅入十球,作客戰鬥能力弱到“打冷震”,今仗對住西甲主場王,皇蘇實在難保不敗。
首循環“床單軍”以一比二落敗,原因係半場踢少一人,實在輸得心有不甘,今戰誓必有仇報仇,初盤馬德里體育會讓一球 / 球半,上季主場曾經大炒皇蘇四球,今次最低收費都要打個五折。
推介:馬德里體育會2:0
足球評述員 Ben
留言