兵工廠難讓“車”
英超今晚上演榜首大戰兼倫敦打吡,阿仙奴硬拼車路士。聯賽只剩六輪比賽,落後十分嘅阿仙奴要超“車”,難度的確相當大,但同市死敵碰頭,且仍有一絲希望,兼加上雲總與老摩嘅恩恩怨怨,當然兩位老人家都唔衰得,肯定戰況依然激烈。
阿仙奴近期狀態保持得相當穩定,聯賽八連勝守住第二位,足總盃又殺入决賽,美中不足只係歐冠盃在十六強出局。雲總今季總算交出成績,借勢行兇,今仗必會與車仔力戰到底。不過,阿仙奴近年對住車仔明顯處於下風,近六次對戰只能和過一次,其餘五場都成為“車”下亡魂,似乎整定被藍軍食住。
車仔上場擊敗曼聯後,可以話手執盃耳,只要攞多八分,就可以重奪英超錦標,老摩肯定計晒數。由於三大攻擊手迪亞高哥斯達、杜奧巴及利美都因傷缺陣,前線火力大受影響,以老摩一向部署,隨時擺出無鋒陣,甚至再度出招施展“泊大巴”陣式,即使取一分對車仔嚟講依然處於極大優勢。初盤阿仙奴讓平手/半球,兵工廠要贏波邊有咁容易!
推介:車路士1:0
足球評述員 Ben
留言