車仔踏上“晶”途
如無意外今晚應該可以見證今季英超聯賽冠軍誕生,車路士只要在對手水晶宮身上全取三分,就可以提早封王,相信史丹福橋球場將會全場沸騰。排第十二位嘅水晶宮已經無憂無慮,餘下幾場比賽只係踢“交差波“,與車仔又無仇無怨,又點會阻人發達,車仔應該勝券在握。初盤車路士讓球半,捧“藍戰士”贏波贏盤踏上“晶”途。
除實力上高於對手外,車仔更有唔少有利因素,特別係主場戰績,十六場取得十三勝三和不敗,攻入卅一球只失七球,可以話所向披靡,最後一場主場將會對新特蘭,今季應可保持主場不敗之身收官。球隊目前人腳相當完整,只有利美一名傷兵,射手迪亞高哥斯達亦可能復出,必會全力爭取做神射手,仲有上場打破入球荒嘅杜奧巴,火力充足嘅車仔讓得起球半。
水晶宮搶夠分後,近兩場表現軟手軟腳,主場分别輸畀西布朗與侯城兩支下游球隊,反映球隊鬥心明顯下降,今晚去到史丹福橋球場,就當祝賀“老摩”,踢場賀“帥”波。
推介:車路士3:0
足球評述員 Ben
留言