天氣炎熱長跑宜補水
長跑運動近年在澳門越來越受歡迎,話咁快又到聯賽第二回合,記得去年該賽事氣溫偏高、濕度較大,賽道沿途冇樹蔭遮擋,加上水站不足,據了解有跑友暈倒送院。夏天的長跑聯賽又嚟,參加者希望賽會能夠改善,免得再有人不適。
今次賽道與往年不同,由路氹移設科學館至西灣橋口一帶,近日氣溫最高逾攝氏三十度,濕度亦不低,影響身體散熱,水分卻不斷流失,切勿忽略補水,屆時經過水站最好濕濕個嘴。講到水站,跑友相當緊張,去年便有反映不足,跑友希望能按比賽當日實際情況人性化增加,不僅僅局限於國際田聯的規定,畢竟夏天作賽又熱又曬,補水一環相當重要,且衆多業餘跑友參加。提提比賽“初哥”,參賽經驗不多,賽道水站有限,切勿後知後覺,想飲水才發現“蘇州過後冇艇搭”,需捱到終點。
除賽道不同外,今次賽事又有一不同情況。去年賽前一晚剛好碰上歐冠盃决賽,部分參加者捱夜睇通宵波再比賽,加重自身負擔。今次情況不同,最近一場歐冠盃賽事都要下周才進行,參加長跑聯賽的波友不再陷於兩難局面,賽前可有更多休息時間。最後一提便是量力而為,本地越來越多居民參加長跑賽事,第二回合亦有不少,但比賽當然吸引很多系統性訓練的運動員,咪人跑幾快你又跟,配速一環最重要因應自己能力。
賈大廚
留言