拿坡里難殺“迪”
兩支意甲球隊,費倫天拿與拿坡里能否雙雙殺入歐霸盃決賽,就要睇明晨四強次回合,但形勢上對兩隊極為不利。費倫天拿首回合已落後三球,對住衛冕冠軍嘅西維爾,要翻盤的確相當艱難。
拿坡里機會較好,不過作客去到烏克蘭,對住戰意十足嘅迪尼普亦並非易踢,始終失去天時地利人和,今仗毫無必勝把握。初盤拿坡里仲要讓半球,受讓嘅迪尼普值博。
既然能夠殺到入歐霸盃四強,迪尼普稱得上是黑馬,所以戰鬥力絕對不能睇低。首回合處於劣勢下亦能逼和拿坡里,證明呢支烏克蘭球隊充滿頑強鬥志。今場返到自己地頭,肯定會更加落力兼爭勝決心加強,揸住一個作客入球在手,但求坐和望贏。
牌面上,拿坡里的確可以稍為睇高些小,可惜近期整體發揮較為飄忽,尤其近兩場踢作客,先敗於恩波里腳下,上場只能逼和篤定降班嘅帕爾馬。最慘係兩場波共失六球,防守相當不穩。今仗力求爭勝嘅拿坡里,防線可能成為最大致命傷。
推介:和波1:1
足球評述員 Ben
留言