兩大門神成搶手貨
今季歐洲各大聯賽打埋今個星期就要“冚旗”,只剩幾項盃賽及歐洲兩大盃賽,歐霸盃與萬衆期待嘅歐冠盃決戰。
球季雖然接近尾聲,但各大球會已經開始密鑼緊鼓,準備為下季招兵買馬。近日最熱嘅轉會消息,就係曼聯門將迪基亞,今季四大皆空嘅皇馬,擺到明要將呢位西班牙新鋼門收歸旗下,代替舊鋼門卡斯拿斯。據聞皇馬已經與基仔傾掂個人條件,只等曼聯會否放人兼轉會費問題。聽講價錢大約四千萬歐元左右。不過,到目前為止,曼聯似乎唔想放走呢位今季表現相當突出嘅門神,球會更加頒發本年度雙料最佳球員畀基仔,希望軟硬兼施留住鋼門。
但講真一句,皇馬財雄勢大,一向要風得風,要雨得雨。小弟冇估錯的話,迪基亞下季應該重返西甲效力皇馬。
講開門將,曾經亦叱吒一時嘅捷克門神施治,由於在車仔只做後備,預料下季會棄“車”而逃。以施治嘅身手,不愁冇大會落腳,阿仙奴、曼聯或聖日門應係施治的目的地。
足球評述員 Ben
留言