巴塞衆星光宗耀“祖”
歐冠盃決賽經過九十分鐘激戰後,巴塞羅那終於以熱門姿態勝出,第五度奪得歐冠盃冠軍。至於落敗嘅祖雲達斯,面對地上最強嘅巴塞,表現並不失禮,亦曾經令到對手防線兵荒馬亂,輸波只可講句“雖敗猶榮”。
巴塞今次再度勇奪歐冠盃,唔少球員的確光宗耀祖,隊長沙維正式賽事第九百場為球會上陣,可以話意義深長,更帶住三冠王榮譽離開球會,簡直係一個非常完美嘅結局。
美斯更加唔使講,奪得歐冠盃兼與C朗及尼馬成為今季歐冠神射手,未足廿八歲已得到廿三個冠軍獎項,呢位阿根廷球王,成就已經超越馬勒當拿。巴西新球王尼馬今季同樣威過威士忌,三冠王功臣之一,再加西班牙盃與歐冠盃金靴獎兩項個人榮譽,相信係踏足球壇以來,最難忘的一季。仲有“牙擦蘇”得到夢寐以求嘅第一個歐冠盃冠軍獎牌。
“小白”恩尼斯達成為今場決賽最佳球員,無論對球會嘅貢獻,抑或個人成就,肯定對每一個巴塞球迷嚟講,“在心中”。對於主帥安歴基,更加係“從未如此擁有”。
Ben
足球評述員
留言