德美勝在好朋友

媒體

分類

新聞

德國同美國好似簽咗合約一樣，每年六月都要踢返場，前年路維帶隊去美國，同奇連士文“揸弗”嘅美國踢場友誼賽，結果合演一場入球騷，美國險勝四比三，場波兩隊都玩得好開心。

去年世界盃決賽周，咁啱兩隊又撞埋一組，最後一場分組賽，幾乎要踢場“默契波”，最後德國僅贏一球，雙雙攜手出線。明晨路維與“奇哥”兩兄弟又再聚頭，輪到美國報聘，作客德國踢熱身賽。賽後唔使問，兩老友一定嘆返杯德國啤。

講實力，世界盃冠軍應該在美國之上，但既然兄弟波，又點會大開殺戒，勝負料在一球上落。初盤德國讓球半，想贏盤，不妨考慮美國佬。

德國在周日凌晨將要踢歐國盃外圍賽，雖然對手係弱到不得了嘅直布羅陀，勝算起碼有八成以上，但相信今場友賽亦唔會去得太盡，最重要係演練球隊陣式，勝負問題不大。

相反，美國上場友誼賽踢得相當認真，與荷蘭鬥攻鬥搶。多名新丁為博上位，表現相當落力兼搶鏡。今仗與勒住嚟打嘅德國交手，美國輸唔晒。

推介：和波2:2

足球評述員 Ben