古仔采潔眉目傳情
在新片《巴黎假期》中,古天樂的“終極任務”就是要與郭采潔大跳華爾滋。導演阮世生特意找來兩名俊男美女舞蹈老師為兩人上了一課速成班。
身為舞蹈初哥,兩人在練習當中不乏蝦碌場面。古仔的老師提示他跳舞時要望實對方作眼睛交流,到後來練習磨合時,古仔就一路望實采潔,反而令大家忍俊不禁,只顧大笑而跳不下去。當兩人上手後,更穿華麗舞衣試位排練,一次過順利完成需時三分多鐘的舞蹈戲份,連老師也稱讚兩人學習快、有毅力及有默契。
古仔坦言今次要跳舞是一個高難度挑戰,鬼馬的采潔在旁不停叫古仔做師兄又跳跳紮,令古仔“冇佢符”,古仔笑言:“我冇乜跳舞天份,佢(采潔)就冇時定!之後如果有歌舞片想搵我,都盡量唔好搞喇!”采潔則表示穿上華麗的公主長裙跳舞感覺新鮮,自己亦有像公主一樣的感覺。
留言