士砵亭勁炒葡人之家
【本報消息】昨晚氹仔運動場上演兩場甲足賽事,士砵亭四比○炒起葡人之家,追至與鄒北記同分。另一戰蒙地卡羅同樣四蛋炒勵馳,拋離鄒北記三分穩坐“老三”位置。
昨晚士砵亭一開波便開始搶攻,但頻頻失機未能打開記錄。戰至廿二分鐘最近腳風甚順的森派奧為“綠白軍”打開缺口,為大勝拉開序幕。另一位當弗射手盧保亦不示弱,兩分鐘後為球隊再下一城,士砵亭半場領先二比○。易邊後士砵亭繼續攻勢,葡人之家一度成功守住大門,直至六十一分鐘洪拔圖建功,加上華將陳健星七十二分鐘埋齋,士砵亭四比○贏波而回。
蒙卡輕取勵馳
另一戰蒙地卡羅踢得相當主動,泰亞高開波五分鐘為蒙卡閃電開齋,三分鐘後再建一功梅開二度,開賽八分鐘蒙卡已領先二比○。上半場其餘時間蒙地卡羅仍有不少機會,但始終唔夠運,直至四十分鐘保羅小禁區左角施射中柱,後上的潘頌嵐執雞篤入,半場領先三比○。下半場勵馳迎來多次機會,但未能轉為入球,臨完場十分鐘連拿度為蒙地卡羅埋齋,鎖定四比○勝局。
贏波的士砵亭積分榜成功追和第四位的鄒北記,同時手執卅二分,但士砵亭因對賽成績遜,暫列第五。蒙地卡羅成功拋離士砵亭及鄒北記,以卅五分排第三,老三位置爭奪逐漸明朗化。葡人之家十二分排尾二,落後第七的雀聯兩分,煞科戰對勵馳將成護級最後關鍵。勵馳繼續十六分排第六。
留言