瑪莎喺希臘聖托里尼秘密補辦浪漫婚禮。
除冠佑缺席外,五月天其他成員都前嚟見證好友重要嘅一刻。
五月天瑪莎喺去年11月公開婚訊,坦承同設計師女友Vicky已經登記結婚。不過,工作忙碌嘅佢就一直未舉辦婚禮。日前,二人被目擊現身希臘聖托里尼,更傳出已經秘密補辦婚禮,而五月天大部分成員都有出席,見證幸福一刻。消息傳出後,五月天所屬嘅經理人公司「相信音樂」喺微博發文,證實瑪莎已經喺希臘舉辦婚禮,到場親友約40人,現場氣氛非常浪漫。兩人辦完婚禮後,仲順便喺當地度蜜月添!
低調完婚後,瑪莎就透過「相信音樂」發布一輯婚禮上嘅相,感謝大家嘅祝福。佢表示自己好鐘意希臘聖托里尼嘅碧海、藍天、白雲,所以決定喺當地舉辦一場「親朋好友的旅遊」,佢講笑話自己嘅婚禮係一個「唔似婚禮嘅婚禮」,主要都係一班朋友輕鬆玩玩,仲話每個人都係伴郎伴娘。至於五月天嘅其他成員,全部都自己出錢買機票去出席婚禮,而大哥李宗盛亦有出席,所以令到瑪莎非常感動。
留言