澳門本地原創音樂頒獎禮——第13屆《澳廣視至愛聽力》將於7月31日晚上8時於澳門文化中心隆重舉行頒獎音樂會，入圍的69首參賽歌將會競逐多個獎項。為了令各位更了解一眾本澳歌手和他們的候選作品，《力報》由即日起訪問各入圍歌手，大談他們歌曲的創作歷程！

自我介紹：
我係何嘉茵，諗返第一首歌〈純屬虛構〉獲得「澳廣視至愛新聽力」最佳新聲獎，唔經唔覺已經九年！今年9月，將會同其他八位澳門歌手推出《澳門主旋律Vol.2》，請大家到時多多支持！

點解要聽你首歌？
〈難得你〉係想多謝我身邊好重要嘅人，患病嘅兩年間一無所有，喺我最落魄嘅時候，佢仍然對我不離不棄。

除咗唱歌，仲有乜嘢叻？
跳舞！曾經擔任歌舞組合女主音，又唱又跳。

個人金句/座右銘？
Everything will be ok！

最喜愛嘅一句/兩句歌詞？
夢已醒，雨天轉晴，天做證，是你為我率領。〈難得你〉

如果得獎，你有乜嘢想講？
多謝一直喺身邊支持我嘅人，無論何嘉茵變成點，你哋陪我渡過每個難關，今日嘅成功同喜悅係屬於我哋大家，Love you all！

自我介紹：
曾參與台灣偶像劇《我要變成硬柿子》嘅創作同演唱片尾曲〈我們是戀愛的人〉、插曲〈我很好〉，當時用藝名「田欣」。近年回澳發展，改用原名賴珍珍，簽約讚娛樂成為旗下藝人。

點解要聽你首歌？
〈殘缺〉係我第二首寫中風嘅歌，故事係寫主角面對曾經相愛嘅人，最後只剩低自己。刻意用較有意境嘅文字去寫，除咗配合中國曲風，其實都想表達對呢段愛情已轉化為較內心嘅層面。

除咗唱歌，仲有乜嘢叻？
我鍾意創作、畫畫、睇書、行街、冥想……

個人金句/座右銘？
只要一步一步去做，多煩人的事總能解決。

最喜愛嘅一句/兩句歌詞？
做個有痛覺的人。〈人非草木〉

如果得獎，你有乜嘢想講？
多謝所有人，多謝公司畀我有機會再一次喺澳門發表作品，多謝屋企人對我嘅支持同一直當我係偶像。

自我介紹：
大家好，我哋係戴顯揚「些些」同李俊傑「Jacky」，兩位樂壇新人合作，希望大家多多指教！

點解要聽你首歌？
兩位樂壇新人「跨年代」合作，同一首歌，兩種風格；聽一首歌，兩種享受，非常符合現今社會嘅需求。

除咗唱歌，仲有乜嘢叻？
一個唱另一個深情等住唱、一個唱另一個和住唱、兩個一齊大聲唱、深情對望、擺偶像Pose，以上全部都好叻。

個人金句/座右銘？
你是你自己的偶像！

最喜愛嘅一句/兩句歌詞？
還有我，還有你，多麼好。〈偶像〉

如果得獎，你有乜嘢想講？
多謝父母將靚聲遺傳畀我，多謝Tomy同Jason製作一首好歌畀我哋發揮，多謝「樂壇新人」願意同樂壇新人合作，多謝！