澳門本地原創音樂頒獎禮——第13屆《澳廣視至愛聽力》將於7月31日晚上8時於澳門文化中心隆重舉行頒獎音樂會,入圍的69首參賽歌將會競逐多個獎項。為了令各位更了解一眾本澳歌手和他們的候選作品,《力報》由即日起訪問各入圍歌手,大談他們歌曲的創作歷程!
自我介紹:
大家好!我係今年澳門樂壇嘅新人歐陽兆樺,好開心第一年參加新聽力就有兩首個人歌曲入圍,希望大家會鍾意我今年嘅作品同支持我啦!
點解要聽你首歌?
一個參加比賽接近三年都冇唱過一首快歌嘅歌手,第一首個人作品就係快歌,咁大突破,一定要聽啦!
除咗唱歌,仲有乜嘢叻?
無厘頭嘅嘢我好叻,係一個滿分嘅小屁孩。
個人金句/座右銘?
夢想路不遠,貴在堅持。
最喜愛嘅一句/兩句歌詞?
踏著這腳步,步入你天空。〈Party Love〉
如果得獎,你有乜嘢想講?
感激每個喺我夢想路上出現過、幫助過我嘅人。全靠你哋先有今日呢個充滿夢想同動力嘅歐陽兆樺。
自我介紹:
我係程文政,係一名藝人、歌手、作曲人、填詞人、主持、演員……我仲係一個無聊嘅瘋子。
點解要聽你首歌?
2014年嘅〈家裡的餐桌〉你仲記唔記得?呢首歌後我成年寫唔到歌,我懷疑係媽媽離開我之後,同時帶走咗我呢個能力。成日有人話天蠍座記仇,其實天蠍座係會好記得從前嘅人事物,望返轉頭,無論得定失,相信都有無比嘅得著。
除咗唱歌,仲有乜嘢叻?
自己同自己玩.模仿.做配樂.改歌詞!
個人金句/座右銘?
我們不能改變大世界,但我們至少可以創造自己的小宇宙!
最喜愛嘅一句/兩句歌詞?
始終得到了,或失去了,就如人生寶貴的一課!〈可惜我愛懷念〉
如果得獎,你有乜嘢想講?
多謝鍾意我嘅朋友,多謝真係會聽我唱歌嘅朋友,多謝公司,多謝家人,多謝父母,多謝太太。
自我介紹:
Catalyser嘅意思係催化劑,大時代會令夢想、堅持卻步,等我哋用最簡單同直接嘅方式,將呢份催化劑嘅能量送畀你。
點解要聽你首歌?
呢首歌見證咗Catalyser今年嘅新突破,有別於以往嘅曲風、題材,我哋今年將會作出更多嘅新嘗試,同大家分享更多唔同風格嘅作品。
除咗唱歌,仲有乜嘢叻?
我哋係一隊樂隊,除咗唱歌,當然唔少得打鼓、彈結他、彈低音結他、彈琴啦!
個人金句/座右銘?
我們有各自的艱難要面對,但音樂是生活的催化劑,好使我們堅持我們的路。
最喜愛嘅一句/兩句歌詞?
日子變幻卻依舊帶著那份英勇。〈態度〉
如果得獎,你有乜嘢想講?
多謝TDM,多謝公司,多謝認同我哋嘅人,更要多謝唔認同我哋嘅人!
留言