黑晒臉嘅吳建豪避談同太太現時嘅感情狀況。
吳建豪同老婆石貞善結婚唔夠兩年,已經多次傳出婚變。
吳建豪同新加坡百億豪門老婆石貞善(Arissa)結婚唔夠兩年,屢次傳出婚變。早前,佢哋喺Instagram指罵對方兼互相取消關注。當時有消息話,佢哋因為性生活唔協調,已經搞緊離婚!其後,吳建豪喺Instagram貼出同老婆嘅激吻相,力證夫妻關係良好。不過,前日Arissa又喺網上發功,貼出「千字文」狂插老公,仲話自己被欺騙,長期受情感虐待,令到婚姻疑再次亮起紅燈!
噚日,吳建豪出席新片發布會嗰時,被問到同太太現時嘅感情狀況,吳建豪即時黑臉,仲喺記者耳邊大叫:「What?」之後佢話:「關於這事情,跟每個人一樣,保持私隱,多謝關心。」再問婚變嘅報道會唔會影響心情?吳建豪就串爆咁答:「如果你們繼續問,也許會吧!」提到太太發表「千字文」鬧佢,有無唔開心?吳建豪話:「暫時為止,私人事情都是不談。」
留言