澳門本地原創音樂頒獎禮——第13屆《澳廣視至愛聽力》將於7月31日晚上8時於澳門文化中心隆重舉行頒獎音樂會，入圍的69首參賽歌將會競逐多個獎項。為了令各位更了解一眾本澳歌手和他們的候選作品，《力報》由即日起訪問各入圍歌手，大談他們歌曲的創作歷程！

自我介紹：
我係陳倚俐！鍾意短頭髮，唔鍾意長頭髮；鍾意黑色，唔鍾意紫色；鍾意Band Sound，唔鍾意Classic；鍾意貓，唔鍾意老鼠。

點解要聽你首歌？
佛語有云：「菩提本無樹，明鏡亦非台。」睇個歌名〈本無樹〉都知唔係一般主流歌！曲風與別不同，有啲電子、又有啲Metal，仲要有啲迷幻，聽落係咪好吸引呢？

除咗唱歌，仲有乜嘢叻？
用電飯煲煮飯煮餸，因為夠晒方便，準備好晒啲材料，擺晒落電飯煲，撳個掣就有得食。

個人金句/座右銘？
Nothing is difficult if you take the first step to try.

最喜愛嘅一句/兩句歌詞？
凝住笑容會乏力，賜予我多少價值。〈硬幣〉

如果得獎，你有咩嘢想講？
多謝爸爸媽媽，冇佢哋嘅遺傳生咗一個識唱歌嘅女，我就冇機會可以加入Chessman，冇機會有呢首屬於我嘅〈本無樹〉，冇機會可以企喺到同佢哋講多謝。

自我介紹：
Hello大家好！我係蘇俏慧（Kayaku），係一個為夢想、音樂同愛而存在，並集多功能於一身嘅古怪巨蟹女孩。

點解要聽你首歌？
呢首歌係澳門少有嘅日系輕舞曲，重點係聽完心情會變靚，個心碎咗都會好番，與其睇醫生醫情傷，不如聽我首〈Don't Break My Heart〉仲快好啦！

除咗唱歌，仲有乜嘢叻？
都幾多（口架）！化妝、美容、砌模型傢俱、電子產品軟體高手、彈結他、拍片剪片、作曲、填詞……

個人金句/座右銘？
首先要將壓力化為動力，繼而若要如何，全憑自己努力面對，最後每日都會有好事發生。

最喜愛嘅一句/兩句歌詞？
能成為密友大概總帶著愛。〈勞斯萊斯〉

如果得獎，你有咩嘢想講？
我估……我應該乜都未講就喊咗先！哈哈哈！

自我介紹：
我叫芷君，我鍾意天馬行空嘅思考，鍾意喺生活嘅小事入面感受生命！我鍾意唱歌，因為學習唱每一首歌都可以畀我唔同嘅經驗同感受，亦會領略到歌曲背後唔同嘅故事。

點解要聽你首歌？
過去我較擅長唱抒情或節奏較慢嘅歌，今次首歌打破咗我一向嘅傳統，演繹出較強烈嘅感覺。另外，呢首歌嘅製作團隊所有成員都係第一次合作，好多新嘗試，希望畀大家一種特別感覺。

除咗唱歌，仲有乜嘢叻？
除咗唱歌，我仲好鍾意下廚同沖咖啡，因為我覺得呢啲興趣可以為生活調味。

個人金句/座右銘？
放膽去做自己認為對的事！

最喜愛嘅一句/兩句歌詞？
改變亦沒要緊，太著迷一世會敗陣。〈剎那永久〉

如果得獎，你有咩嘢想講？
多謝製作團隊各成員嘅欣賞同信任，多謝支持我嘅朋友，亦要多謝令我成長嘅你，最後要多謝自己，因為又成就多一件值得紀念嘅事。