澳門本地原創音樂頒獎禮——第13屆《澳廣視至愛聽力》將於7月31日晚上8時於澳門文化中心隆重舉行頒獎音樂會，入圍的69首參賽歌將會競逐多個獎項。為了令各位更了解一眾本澳歌手和他們的候選作品，《力報》由即日起訪問各入圍歌手，大談他們歌曲的創作歷程！

自我介紹：
我係創作歌手AJ！身為土生葡人，我希望透過音樂呈現自己嘅文化背景同經歷。希望大家會鍾意我嘅音樂，支持我喺8月推出嘅首張個人專輯〈Macanese〉！

點解要聽你首歌？
呢首歌特別在開始嘅部分加插咗一段葡文讀白。呢段詩詞唔單止加強咗整首歌嘅意境，仲畀咗個機會我喺歌曲上運用我嘅母語！

除咗唱歌，仲有乜嘢叻？
我作曲都唔錯（口架）！今年為自己同其他歌手寫咗十幾首歌，算係出道以嚟最多產嘅一年啦！

個人金句/座右銘？
相信自己嘅直覺，覺得啱嘅，就去做啦！

最喜愛嘅一句/兩句歌詞？
無極限的我擊退了心魔，無極限的我怎可一語道破。〈無極限〉

如果得獎，你有乜嘢想講？
音樂令我搵到人生意義，多謝家人、朋友、戰友同粉絲嘅支持！希望可以繼續做多啲令人眼前一亮嘅作品！

自我介紹：
單行道喺2014年年初成立，樂隊以原創音樂同流行搖滾為主，歌詞內容大多表現生活當中嘅所見所聞，寄託夢想。單行道嘅命名，係指喺音樂路上只會向前走，唔會往後退。

點解要聽你首歌？
〈活〉描述咗某人活在江湖，對江湖嘅生活感到黑暗，即使今日能有幸生存，仍不知明日如何。〈活〉可以令聽眾喺腦海中呈現江湖嘅黑暗畫面，感受到江湖嘅黑暗味道。

除咗唱歌，仲有乜嘢叻？
單行道嘅所有成員都比較多鬼主意，得閒就會拍一啲開心嘅歡樂短片，希望將歡樂送畀大家。

個人金句/座右銘？
謙虛學習，天天進步。

最喜愛嘅一句/兩句歌詞？
用我一雙手，改寫天空每段白雲。〈活〉

如果得獎，你有乜嘢想講？
多謝所有支持我哋.畀機會我哋嘅人。我哋仍然會繼續向前，永遠為澳門音樂盡一點綿力。

自我介紹：
我叫祖絲，公司讚我人靚聲甜，所以簽我做歌手。之後羅嘉豪帶我做司儀，又有人讚我高貴優雅，搞到人哋臉都紅晒！

點解要聽你首歌？
羅嘉豪同湯小康（〈情非得已〉作曲者）一齊監製〈我是誰〉，雖然小康已經轉戰電影界，但佢都返嚟幫手做音樂監製，真係唔知嘉豪點樣氹到佢「落搭」。

除咗唱歌，仲有乜嘢叻？
嗯……好多喎！唯有隨便答一樣最叻.啦，就係做司儀！

個人金句/座右銘？
機會是留給有準備的人。

最喜愛嘅一句/兩句歌詞？
人人評斷我，無奈我仍然如自我，不怕火。〈我是誰〉

如果得獎，你有乜嘢想講？
我想多謝我嘅戰友羅嘉豪同AJ，令我音樂路上不孤單；多謝我家人同未婚夫嘅無限量支持；多謝粉絲鍾意我嘅音樂。

自我介紹：
大家好！我係澳門藝人羅嘉豪！

點解要聽你首歌？
呢首係號稱全宇宙最慘嘅失戀歌，加上橫誇16度音域，尤如鬼哭神嚎般盪氣迴腸，幾多單身女子聽到哭斷腸，聽過你就知有幾勁！

除咗唱歌，仲有乜嘢叻？
唱歌、跳舞、司儀、作曲、填詞樣樣都識少少啦！今年比較叻嘅事就係喺香港書展出咗本書，講述我用咗45日由香港開車到歐洲。

個人金句/座右銘？
沒有不可能的任務

最喜愛嘅一句/兩句歌詞？
如大將贏硬仗，危難裡不退讓。〈無極限〉

如果得獎，你有乜嘢想講？
到時你嚟睇咪知囉！

自我介紹：
大家好！我係BlackSheep嘅主音Yaya！

點解要聽你首歌？
有可曾將信任全交予一人，但到頭來發現這一切只是一個騙局？看似滿腔熱誠的人原來只是用金錢堆砌的傀儡。人生路漫漫，總會遇到不少這些人，但千萬不要被挫敗，要保留自己最真誠的心去奉獻給適合的人。

除咗唱歌，仲有乜嘢叻？
講粗口……我好爛口（口架）！

個人金句/座右銘？
有乜留返拜山先講！

最喜愛嘅一句/兩句歌詞？
耗盡了僥倖，放縱了心癮。來注視我雙神，比美無憾。〈承樂〉

如果得獎，你有乜嘢想講？
首歌係我哋嘅心血結晶，作品對於一個藝術家嚟講，等同於生命，希望大家繼續支持本地音樂。

自我介紹：
我係嚟自澳門讚娛樂製作有限公司嘅創作型男歌手梁健邦。

點解要聽你首歌？
每一個城市都有屬於自身嘅問題，當問題深化到無法解決嘅時候，會演變成一種惡性循環，但各種難題到最後，其實都可以用愛去化解。而〈封鎖〉，就係用搖滾、用音樂帶出呢個訊息。

除咗唱歌，仲有乜嘢叻？
講嘢！我可以一日講24小時都唔怕攰。

個人金句/座右銘？
有啲事做咗未必有，但唔做一定冇。

最喜愛嘅一句/兩句歌詞？
愛若難以放進手裡，何不將這雙手放進心裡。〈人來人往〉

如果得獎，你有乜嘢想講？
多謝一直支持我嘅朋友、教我唱歌嘅老師、屋企人，仲有多謝讚娛樂製作有限公司，最後仲要多謝TDM對我首歌嘅肯定。

自我介紹：
大家好，我地係Crossline！

點解要聽你首歌？
成長彷佛是一個黑洞，它總會出現在我們生命之中，毫無保留地吸走我們擁有過的快樂，想要尋回，卻一去不復再。其實，只要我們守護著心中的盼望，看著遠方的星空，繼續向前走，堅信在某一個明天，始於能夠找到一顆屬於自己的新星。

除咗唱歌，仲有乜嘢叻？
我哋最鍾意打Poker！

個人金句/座右銘？
無喎！Hehe算唔算？

最喜愛嘅一句/兩句歌詞？
May姐係點叫？哈哈哈哈哈哈哈哈哈哈哈哈……〈May姐係點叫？〉

如果得獎，你有乜嘢想講？
多謝！Hehe！

自我介紹：
大家好，我係何嘉茵！諗返第一首歌〈純屬虛構〉獲得「澳廣視至愛新聽力」最佳新聲獎，已經係九年前啦！去年加入《澳門主旋律》呢張慈善專輯嘅大家庭，又再開始做自己鍾意嘅音樂，重拾對唱歌嘅熱誠。

點解要聽你首歌？
呢首歌係一首勵志歌，亦希望用呢首歌提醒大家，無論遇到幾多困難，最終要靠自己嘅意志去克服難關。

除咗唱歌，仲有乜嘢叻？
扮靚！因為成日研究唔同產品、時裝。

個人金句/座右銘？
只要堅持，不放棄，一定會成功。

最喜愛嘅一句/兩句歌詞？
無人可比潛能，重生那道行，自問盡我畢生英勇！〈My Dear Cherry〉

如果得獎，你有咩嘢想講？
多謝一直支持我嘅朋友、拍擋，一路上有大家嘅鼓勵，令我可以實現夢想，希望可以送更多唔同嘅音樂畀大家。

自我介紹：
我叫馬曼莉，芳齡20有幾，有一對小眼睛（經常被誤會好眼瞓）同一隻明顯嘅爆牙（影相睇落好似冇咗隻牙）。鐘意唱歌、跳舞、運動，係個手腳發達、頭腦簡單嘅人。

點解要聽你首歌？
呢首歌係我嘅一個突破，今次搵到杜俊瑋幫手，佢嘅Rap令呢首歌生色不少！〈召喚術〉亦會拍MV，加入跳舞元素，無論曲風甚至整件事都係我第一次。

除咗唱歌，仲有乜嘢叻？
我最叻係唔怕凍、唔怕黑！亦會演下戲！

個人金句/座右銘？
我不是以為自己已經取得了，我只有一件事，就是忘記背後，努力面前的。

最喜愛嘅一句/兩句歌詞？
召喚術賜予自我，逐漸地愛上自我，沒限定那個是我。〈召喚術〉

如果得獎，你有咩嘢想講？
多謝身邊所有人都好錫我，馬曼莉會不斷突破，唔會令大家失望。

自我介紹：
從小鍾意唱歌，細個有幻想過未來做各種職業嘅可能性，但無諗過做歌手。呢幾年不斷去參加比賽突破自己，得到滿意嘅成績。

點解要聽你首歌？
〈破曉之前〉係我第一首國語歌，除咗承載我對愛情、音樂嘅態度，亦包含咗曲詞創作人廖俊朗對音樂嘅熱誠同努力，佢係第一次參加新聽力，希望大家比多啲支持同鼓勵佢！

除咗唱歌，仲有乜嘢叻？
懶床最叻，可以懶兩個鐘。

個人金句/座右銘？
只要你確信自己正確就去做，唔好因為逃避批判或害怕被評論而放棄。

最喜愛嘅一句/兩句歌詞？
亂世有各種繁華，夜晚未覺得可怕。〈小智慧〉

如果得獎，你有咩嘢想講？
一定要多謝公司上下，包括：歌手、同事、老闆，仲有廖俊朗，有佢哋嘅信任同支持，呢首歌先會誕生。唔少得鍾意呢首歌嘅人，你每一次撳「Play」，都係我繼續努力嘅原動力。