特多搭墨西哥
美洲金盃賽明早繼續有四強爭奪戰,頭場特立尼達和多巴哥對巴拿馬。特立尼達和多巴哥在分組賽表現突出,兩勝一和以首名出線,最後一戰對住勁旅墨西哥,依然力拼到底,全憑球隊上下一心,目前士氣更加雄心萬丈,今場對住同級波嘅巴拿馬,以三場波攻入九球嘅火力,絕對有力斬殺對手。巴拿馬能夠打到入八強都算係“掹車邊”,球隊話強唔強,話弱唔弱,表現好壞都要睇臨場發揮。講實際,始終特多較為穩定,初盤開出平手,捧特多可以斬“馬”。
尾場墨西哥對哥斯達黎加。墨西哥被捧為奪標熱門,皆因人腳質素均衡,特别係前線火力,杜斯山度士、卡路士韋拿及古亞達度,都具一定級數份量。縱然對手哥斯達黎加亦非九流之輩,但大賽經驗與戰術墨西哥明顯佔優,應可佔據上風。哥斯達黎加以“三和”成績出線,實際上三場對手只係泛泛之輩,今場對住攻擊力強橫嘅墨西哥,哥斯達黎加將會受到較大威脅。初盤墨西哥讓半球,“仙人掌”應可在九十分鐘內“黎”料。
推介:特立尼達和多巴哥1:0
墨西哥2:1
Ben
足球評述員
留言