「美魔女」羅霖嘅寫真集,吸引全球媒體報道。
羅霖去電台接受訪問時,否認被人包養嘅傳聞。
50歲「美魔女」羅霖(Candy)早前推出寫真集,吸引全球嘅媒體報道,即時成為城中熱話。近日,有報道指Candy獲有「拉鏈大王」之稱嘅熊宏海資助拍寫真,仲開埋娛樂公司畀佢打骰,而Candy亦由深井搬到九龍塘1,500呎豪宅。不過,Candy接受訪問時就否認話:「如果真係有條大水喉射住我,我就唔使咁辛苦啦!」
噚日,Candy去電台接受訪問時,承認由深井搬到九龍塘,但佢解釋:「並非傳聞中租金50,000。搬屋都係希望細仔有更大空間,如果真係被人包養,我一定會買樓,唔會租屋住!」對於報道指「拉鏈大王」豪擲百萬為佢大搞生日會,Candy即時否認話:「生日會只係用咗十萬,仲係我同粉絲會夾份出錢,其實我都唔想搞,係為咗幫電影宣傳先搞!」
留言