舞台劇演惡妻
君如自爆曾反檯
吳君如、黃秋生、甄詠蓓及潘璨良昨日一齊現身舞台劇《狂揪夫妻》的首次宣傳活動。君如表示該劇已彩排近三星期,每天由上午十一時排至晚上七時,有時她疲倦到睡着了。問她有排練到聲沙嗎?君如說:“梗有!經常痰上頸,有時都要死頂。”
君如今次在劇中演一名惡老婆,經常欺負老公。現實中她是否一樣咁惡?她笑說:“一時時啦,需要惡時便會惡。之前都不覺自己似劇中人,但後來就覺得似啦,譬如對一些字眼會好執着。”現實中會“啄”住老公陳可辛不放嗎?她笑說:“咁又唔會,這個只是我的公衆形象,好像一個巴辣的女強人咁,但其實我唔惡的。排戲時大家都話我唔夠惡。”
雖然自認現實中唔係惡妻,但君如自爆當年跟陳可辛拍拖時,曾試過發脾氣反檯。她說:“有一次拗不過佢,將酒店的餐檯反了。當時我自己都唔知怎收科好,落唔到台,覺得自己好丢架,當時就嘭門走了。但這是十幾年前的事了,亦是我最刁蠻最粗暴的一次。”之後陳可辛有否 返?君如笑言:“咁當然啦!但其實佢應該飛起我。”
現實中兩公婆有試過嗌大交嗎?君如指不會:“我覺得私下兩夫妻不要講些傷害對方的說話,要想想怎樣收科。我們的關係未去到這個地步。”
留言