戴遠視鏡拍戲
雨僑食藥止暈自嘲道友
新片《猛龍特囧》除了有向來搞笑的鄭中基(Ronald)主演,自編自導自演的胡耀輝(Mark)和女主角雨僑(Ava)亦有破格演繹。兩人在片中扮演一對非常錯配的兄妹“孟子良”及“孟子君”,阿Mark唔靚仔但夾硬要做明星,明明係靚女的Ava卻要扮大近視傻大姐,鬧出笑話成籮。
正趕住做後期製作的《猛》片,其中一幕戲講述孟子良由孟子君陪同下,約見電影人田啟文試鏡,爭取拍《變形金剛》的機會,希望升呢做國際巨星。Mark對於和Ava的角色錯配,他說:“我覺得世事就係充滿錯配,Ava咁靚女但戲中冇得靚,孟子良可能有才華,但生成咁樣卻想做明星!不過,我相信成功要有實力、努力之外,運氣的確好重要。”
該場戲Ava同樣以大近視造型示人,雨僑笑說:“一路以來這副眼鏡都係致命傷,其實導演、服裝、工作人員都建議不如戴平光鏡,但我覺得戴遠視鏡放到隻眼好大,效果會好笑啲,所以就算要食暈派丸都堅持戴呢副。但暈浪丸得六個鐘效力,所以我要藥接藥咁食,好似道友咁,唔記得食藥,我就開始暈。”
幸好導演安排了另一場戲讓Ava靚番。穿白婚紗出鏡的Ava笑說:“對於唯一場婚紗戲係珍而重之,亦好盡力去做。但場戲又係喊,成套戲都係拍喜劇,我就好似悲劇人物咁,由頭喊到尾。因為呢個女仔好簡單,角色好容易喊,開心又喊,危險又喊,所以拍呢套戲要飲好多水,如果唔係就拍到頭都痛。”
留言