心情緊張嘅陳曉東喺產房外面自拍。
陳曉東貼出老婆抱住細女,互相對望嘅相。
39歲嘅陳曉東又再當爸!繼大女兒朵朵(陳芷霖)喺去年7月出世後,相隔一年,佢老婆又幫佢生多個女,B女約七磅半重,分量十足。兩胎都係女嘅陳曉東,就即時喺微博公布喜訊,除咗分享自己喺產房外面等候嘅自拍照之外,佢仲貼出老婆抱住細女,互相對望嘅相。陳曉東就話:「8月15日小女兒報到!是獅子座,爸爸媽媽會愛你!謝謝大家。」
消息傳出之後,唔少網民都即時向陳曉東講恭喜,仲大讚佢個細女好可愛,有粉絲仲趁機問佢幾時會再嚟第三胎?事實上,陳曉東喺今年年頭出席活動嗰時,就已經講過家人一定要有男丁,所以佢好大機會會追多個仔。至於點解陳曉東嘅「造人」速度會咁快?佢就話係因為自己比較迷信,好想屋企入面有一個屬羊嘅BB,所以先會咁落力!至於細女個名,陳曉東就話未改,但已經搵咗師父幫手。
留言