MV充滿話題性
雨僑無懼外間猜想
雨僑早前拍攝新歌《行為偽術》MV時,不慎被跌落的鐵枝擊中頭頸肩,幸好並無大礙。相隔一個月,這個MV終於昨日火辣出爐。作為港大舊生的雨僑,在尾聲擺出一個空虛寂寞瞓地抱膝的甫士,豈料其後發生港大校委會成員盧寵茂突然腳痛倒地事件,雨僑表示有如預言一樣,確實不可思議。
為了配合主題,雨僑於MV內亦出現素顏加上穿性感Tube Top,以及濃妝艷抹配隆重晚裝兩個截然不同的造型。不過,當中最令人期待的畫面,是導演安排了三段充滿話題性的情節,包括有一對情侶嗌交,女方突然剝裙,嚇到男方嗱嗱臨即刻幫她着裙;另一鏡頭是西裝大叔獲少女陪伴,轉過臉少女卻攬住另一個男朋友,西裝大叔當場傷心落淚,要少女呵番;最後一段則是雨僑和一男一女開心合照,忽然殺出另一名女子搶鋒頭攝位合照。
這三幕似曾相識的畫面,雨僑表示無懼引起外間猜想,她說:“我在搵MV演員的時候,搵咗唔同年紀、唔同性格同特徵的演員去做,係有配合一些大家經常打開報紙見到的各類新聞的畫面,大家覺得係咩新聞就係大家的想像啦。”
談到早前的“失寵”傳聞,雨僑笑說:“實情係多得老闆(蕭定一)的支持,他對旗下每一個藝人都咁好。我們亦各有特點,根本就係一個開心大家庭,對於這些傳聞,我只係一笑置之。”
留言