捧婷婷新片場
謝賢仍拒談曾江
吳家麗前晚率徐子珊、劉心悠、謝婷婷、蔡瀚億、郭偉亮及朱晨麗等演員出席新片《有客到》的首映,當晚有不少藝人前往捧場,包括有麥家琪、夏文汐、葉佩雯、宣萱,以及婷婷的父母“四哥”謝賢及狄波拉等。
婷婷被問是否邀請父母來睇戲?她卻說:“其實係爹哋自己話嚟,佢主動打電話畀我,我都呆咗一分鐘。”說到她被四哥搶晒鏡,婷婷笑說:“帶得佢嚟都明白,我只係想搞好個首映。”婷婷謂不知老竇嬲完未,不過她表示有睇《四個小生》:“有睇爸爸做太空人那一集,見到爹哋好開心,我開心多過驚,爹哋一向鍾意玩,一生人有幾何可以做到這些事?見到佢好似細路哥咁笑得天真活潑,我感動到想喊,希望將來有時間可以同屋企人去旅行。”
四哥與拉姑原本只站在場外,後來被人發現後被圍拍,四哥為免喧賓奪主,示意記者稍後才拍照。儀式結束後,四哥才與拉姑及婷婷影合照並接受訪問。問到他的心情好返未?四哥說:“今日唔講呢啲,總之我特登嚟捧婷婷場,話晒個女都係做得幾部戲,睇完會給她評語。”問到他驚唔驚睇鬼片?四哥就風趣地說:“我咪係鬼囉,我成日都搞鬼啦!”
說到《四個小生去旅行》收視好,會否同一班“小生”食飯?四哥說:“睇吓佢哋幾時得閒,(溝通緊?)等佢哋有時間先講。”原本心情大好的四哥,當聽到問會否約埋曾江時,他即板起面口連聲說:“唔好提呢個人好唔好?畀我開心啲好嗎?”說完即入場。
徐子珊前晚抱住戲中的黑貓現身,她表示剛由馬來西亞做完宣傳返港。她笑說:“見到戲院頭兩行座位吉晒好驚,後來問人才知只是未入場。我也聽聞當地的神功戲會在頭兩、三行座位插香,幸好戲院沒有插香。”問到此行可有遇到怪事?她說:“好彩無怪事,但有聽同事講過。”
在片中飾演女鬼的心悠自認細膽,笑謂到場後仍然掙扎是否出席完記招後就走。她說:“雖然好想睇,但要做好心理準備。我怕睇完後晚上瞓得差,影響到皮膚同胃口及之後的工作。”
留言