波比談吻戲多嘢講

    “波比”歐陽震華，死過翻生，他的新作《東坡家事》又快與觀衆見面了。有指他有資格培訓女藝人，“培訓，邊位花旦呀？”他有“無線花王”之稱，曾與多位名旦演親熱戲。

    談到與女主角拍接吻戲，歐陽震華最難忘的是陳秀雯。“大家都知，我喜歡飮酒食肉，但陳秀雯長期食齋的。嘴對嘴，我的酒氣和肉味，吹入佢口中，豈非冒犯？嘔起上來，點算？”有道德良心的演員，反而自尋煩惱。一於就位……臉貼臉不敢太近，怕酒肉氣吹過去。“我呢個人好難就位，扁口扁面，正吻都冇嘢睇，何況側吻？一試、再試、三試，都唔掂……”歐陽震華自怨自艾，說自己生得“賊眉賊眼”，藝員訓練班畢業後演的第一個角色，就是珠寳店劫匪。當時拍外景遇上眞警察，竟然拔槍相向，還以為他是眞賊哩。

    歐陽震華與陳秀雯拍吻戲，談來有點傷感，為免“過氣”，貼面時總是若即若離。導演大叫“冇嘢睇”，波比泄氣，正要轉身嘆口氣，陳秀雯輕舒玉臂，攬實波比，嬌叱一聲，“我哋嚟啦，做演員吖嘛！”陳秀雯的專業，此生難忘。她為你破戒，還食齋嗎？仲敢問咩……

    歐陽震華“培訓”女藝員，曾整蠱床上的鍾嘉欣。劇情講老人家佈局迫婚，男女主角飮了催情酒。歐陽震華、鍾嘉欣化上滿面通紅的醉酒妝，表演春情泛濫，輾轉呻吟。導演大叫：“吟大聲啲。”鍾嘉欣轉身問：“床上點樣呻吟呀？”歐陽震華即答：“你平時點樣呻吟呀？”鍾嘉欣呆住，波比評曰：“呢個女仔好醒目。”

    “關詠荷的吻戲，難以置信，太奇妙了。”歐陽震華講“培訓”女藝員的另一例。當年拍攝情侶在沙灘定情的一場纏綿戲，三百六十度，馬拉松式迴環拍攝，好浪漫，冇得借位。關詠荷專業好戲，埋位即擁吻，“咦，關詠荷有怪癖，吻不停，講不停……搞邊科呀？”關詠荷一本正經回應：不停吻不停講嘢，效果才似激情舌吻。後來一睇，果然如此。四唇相貼不講嘢，很假。歐陽震華為之折服，假吻看來很眞，要有演技的，邊吻邊講嘢，據講是關詠荷“發明”的。但是否吻着波比，唸着家輝？相信只有她才清楚了。

    高 梁