列強剋星“鎚仔幫”
英超今輪又爆一場,賽前五戰全勝排榜首嘅曼城在自己地頭出擊,以為對住中游分子“鎚仔幫”嘅韋斯咸,贏波應該“依絲執”,點知不幸中“鎚”,又一次印證“波係圓嘅”。
曼城場波踢得好唔好就見仁見智,但韋斯咸穩守突擊踢法果然勁爆,之前已經打到阿仙奴與利物浦冇嘴駁,睇怕曼聯與車路士對住呢支神經質球隊都要小心翼翼。
但話時話,“鎚仔幫”既然連“扑”三支勁旅,亦並非僥倖,事實上今季加入多名新兵後,實力的確大大增強,皮耶特、奧邦拿、摩西斯及謝拉域都係國腳級,蘭仙尼、沙拉迪、沙高與高耶迪等亦屬好波之人。當然,今季才執教球隊嘅比歷絕對有料到,可能球員年代都係中堅出身,所以戰術理念着重於防守,對住強隊踢突擊,真係合晒“合尺(讀作荷車)”。
至於倫敦打吡大戰,車仔終於報回社區盾一敗之仇,連埋歐冠盃連贏兩場,老摩亦可以一洗近期怨氣。雖然目前與曼城有八分之差,不過長途賽,老摩又點會咁快死心,最緊要先追返上前列位置。
Ben
足球評述員
留言