有周刊刊登劉德華帶三歲愛女出席生日會嘅相。
即將喺本月27日生日嘅劉德華,獲歌迷會舉行預祝派對。
一向私生活都勁低調嘅劉德華,鮮有公開提及老婆朱麗倩同女兒劉向蕙(Hanna)。不過,近日有周刊刊登劉德華同歌迷會「華仔天地」預祝54歲生日時,兌現承諾帶埋父母、老婆同女兒一同赴會,可惜Hanna年紀太細,所以表現得有啲陌生,全晚伏喺爸爸嘅胸膛,而劉德華面對愛女嘅嬌柔,亦露出一副冧樣!
劉德華向來視粉絲為家人,佢上周六(19日)出席「華仔天地」為佢預祝踏入54歲嘅生日會。因為去年劉德華曾應承粉絲,話等Hanna三歲就會帶佢出嚟同大家見面,所以今次佢就兌現承諾。當晚,劉德華抱住愛女Hanna,一家人喺台上切蛋糕,之後劉德華獻唱〈中國人〉時,Hanna亦細細聲跟住唱,又用手撫摸爸爸臉頰,場面十分溫馨。
留言