竇靖童去月前往日本參加音樂節,同當地樂隊切磋音樂。
王菲為愛女竇靖童出道一事出錢又出力,真係好上心。
亞洲天后王菲現年18歲大女竇靖童(童童),遺傳咗父母嘅音樂細胞,一直有意進軍歌壇。童童自細熱愛音樂,去年喺美國讀完高中課程後,就一直準備以創作歌手身份出道。去月,佢以香港歌手身份參加日本嘅音樂節,同當地樂隊切磋音樂,下月又將喺北京連開三場大型音樂會。近日,童童被周刊拍到喺香港街頭拍攝MV,相信係為咗年尾推出嘅新碟做準備。
拍攝MV當日,童童一身中性打扮,並以一頭短髮亮相,同媽媽王菲當年嘅形象有啲相似。據知情者透露,王菲近年為童童出道鋪路十分上心,先係將佢交畀當年一手捧紅自己嘅著名經理人陳家瑛,去月仲出動十幾個人帶童童去日本,參加當地嘅音樂節。而下月童童喺北京舉辦嘅三場音樂會,亦都係由王菲贊助。為咗令愛女順利出道,王菲可謂出錢又出力,真係百分百嘅好媽媽!
留言