西甲爭持激烈
今日同大家講吓西甲,因為今季西甲開鑼至今,實在鬥得相當燦爛,踢咗七輪比賽,爭標三大熱門的巴塞、皇馬及馬體會暫時只排三至五位置,爆出榜首頭兩位嘅係維拉利爾與切爾達。
當然,路遙知馬力,聯賽始終係長途賽事,未到終點,都未知邊隊可以笑到最後。不過,睇季初走勢,已經不再係三雄鼎立局面。衛冕嘅巴塞七場聯賽輸兩場,其中一場更大敗一比四畀切爾達,王者霸氣盡失,陣中王牌美斯更要養傷兩個月,恩尼斯達同樣要休戰多場,對球隊確影響極大,統帥安歷基真係要求神拜佛,唔好再有主力一傷再傷。
皇馬雖然保持不敗,但和三場失六分,同樣強勢不足,新接帥印嘅“肥賓”將面對唔小壓力,所以話執教皇馬唔係咁容易。今季人腳變動唔小嘅馬體會仍係奪標分子之一,但無可避免季初必要經過一段適應期,能否一直保持爭標位置,就要睇施蒙尼嘅功力。
值得留意係維拉利爾、切爾達、華倫西亞及西維爾等幾支實力派球隊,隨時可搞亂大局。
足球評述員Ben
留言