謙仔藍得有道理

    有幸與郭富城做“兄弟”，銀幕上拍檔三打白骨精。演沙僧的羅仲謙，走“藍”了，注意，未算走紅！

    電視藝員走上國際大片《西遊記之孫悟空三打白骨精》，升呢麼？羅仲謙否認是升呢，不過自認導演鄭保瑞找他演沙僧時感覺好愕然，因為他心目中，麥長青、徐錦江等資深演員才適合演沙僧。“不過，可能沙僧在唐僧的幾個徒弟當中，最不起眼，只是擔着行李跟尾走，打又唔係好打得，平時又冇主見，可能似我吧……哈哈！”

    其實，導演鄭保瑞今次拍《西遊記》，想找一個全新的沙僧，要好健碩，有霸氣、英氣，但又要符合原著中沙僧忠心戇直裡帶點清純的感覺，所以他想到了英偉俊男羅仲謙。而且要沙僧以全新形象示人，想到了全身藍色。

    謙仔四肢發達，頭腦複雜，他補充導演對“新沙僧”的想像，“這個藍色沙僧，外表好剛強，但內裡卻是個少男，有點小朋友可愛性格。其實真係幾似我，哈哈。而且，由於是演全新的沙僧，沒有比較，所以我演來全無壓力，點做都得啦！”

    藍色沙僧不易造（型），“我每日都要用六個鐘化妝。”羅仲謙說：“要着住成吋厚的肌肉衫，頭又黐滿膠水，出汗後又要補噴藍色，汗水加上顏料，全身黐立立。因為冇得去廁所，所以唔敢多飮水，還要拚命打鬥，呢種感覺好難頂，個人好容易忟憎。但當係一個鍛煉囉，學吓控制情緖都好。”

    “人比人，更醒神。”羅仲謙EQ甚高，他表示：“城城、小瀋陽、馮紹峰這些大師兄們，感受應該同我一樣，但他們都沒有發忟憎，而且我年資最淺，地位又沒有他們高，又點能夠亂咁出聲？其實越拍越難頂，拍戲至尾聲，大家都係靠意志力頂住。我們時常互望，交流眼色：我們幾兄弟一定要捱埋佢，頂住呀！”艱苦亦可以視為人生收穫，謙仔想法並不簡單，“最開心的，是我年資雖淺，但已經可以同城城呢班級數的藝人一齊體會如此遭遇，好似讓我練到金剛不壞之身。哈哈哈。”他說苦況居然能夠開心笑。

    盛傳，三月與楊怡赴泰國結婚？“結婚生仔人生大事，對我來講，必定要做。”羅仲謙堅定回應，“不過，不會給自己時限。結婚時，我會告訴大家，始終我是娛樂圈人，我真心想得到大家的祝福。”

    高 梁