捧紅魔鬼有“水”收
英格蘭足總盃決賽今晚在溫布萊球場上演,曼聯決戰水晶宮。聯賽未能殺上前四失去下季踢歐冠資格,今季戰績依然令“魔粉”失望,紅魔鬼對足總盃確實要志在必得。煞科戰大勝般尼茅夫,球隊仍有一定氣勢,衹要繼續踢出爭勝決心,紅魔鬼奪標在望。
水晶宮屬倫敦球會,話晒今仗都有半個主場之利,但講到整體實力,始終與曼聯有些少差距,何況近十次對賽未贏過兼有七場敗績,今晚對住非要攞返個尾彩不可嘅曼聯,要偷雞爆冷?下次啦。初盤曼聯讓半球,一於捧紅魔鬼大破水晶宮。
據聞今仗係雲戈爾生死一戰,有冇得留低,食粥食飯都係睇今晚能否“掠水”。要贏波就一定要有足夠火力,幸好朗尼已復出,上場與小將拉舒福特都有“士哥”,仲有馬迪爾與馬達,“兩馬”繼續保持佳態。既然係雲戈爾最後一擊,紅魔鬼兄弟們都係時候做返場好戲。
不過,唔好睇小水晶宮嘅戰力,卡比耶、李青龍、夏治蘭及丹恩等都係身經百戰,前線沙高與艾迪拜約亦具一定威脅力。曼聯要求勝都要穩打穩紮,千祈唔好貪勝不知輸。
推介:曼聯2:1
足球評述員 Ben
留言