成日有人話「唔好玩食物」，但遇著「點心代表」出品的得意蠟筆小新流沙包，食之前唔落手玩下，真係對唔住自己！「點心代表」自上個月正式在皇朝開張後，頭炮「醜比頭」系列已甚得食客歡心；來到新一年，就帶來整蠱做怪的「蠟筆小新」系列，將得意和創意融入點心之中，飲啖茶食個包之餘，更令人回復童真！

（前）大象朱古力流沙包 MOP 49/ 2個

（後左）不理不理左衛門奶黃流沙包 MOP 49/ 2個

（後右）小新& friends牛奶流沙包 MOP 49/ 3個

（劉志衡攝）

當古靈精怪又得意的蠟筆小新，變成一籠籠點心之後，更令人愛不釋手！「點心代表」主打三款特色流沙包：「不理不理左衛門奶黃流沙包」以鹹蛋黃和牛奶等製成，用筷子一督、用手擠一擠，小豬就流出黃色「鼻涕」；牛奶流沙包則是以鮮奶、椰奶等製成，帶有椰香；最經典賣相莫過於「大象朱古力流沙包」，忍痛督一下小新再用力一擠，就流出以朱古力粉和蛋黃製成的流漿，過癮啊！

矇矇豬蝦餃海鮮腸粉 MOP 49

蝦餃小新睡在用海鮮腸粉扮成的「被鋪」內，餡料足，得意到令人唔捨得食！

小新&小白松子百合餃 MOP 49/ 3件

松子白合餃內有鮮蝦肉，亦多了松子和白合的清香。

即蒸點心 天然趣致

「點心代表」想透過卡通人物將點心文化打入年輕人市場，點心都是即叫即蒸、賣相趣致，更講求健康。創意之作是將爛瞓小新變成「矇矇豬蝦餃海鮮腸粉」，小新蝦餃有原隻鮮蝦，而「被鋪」腸粉內有鮮蝦、蟹柳和帶子，亦不欺場。除了「三兄弟鮮蝦餃」有啖啖蝦肉，「小新&小白松子百合餃」更在蝦肉餡中混入松子和百合，有口感又香口。大家都記得為食的小新鍾意食西瓜，「真真假假西瓜糕」一端出來就彈彈下，紅色部分用上天然西瓜汁，白色部分是忌廉加牛奶，「西瓜籽」則是香蘭子，西瓜糕味道清甜，相似度奇高。「點心代表」每隔數月就會換一次主題，想鬥快去影相呃Like，就要密切留意！

真真假假西瓜糕 MOP 35/ 3件

西瓜糕用上天然西瓜汁，清甜軟滑，加埋粒粒香蘭子口感豐富。

小白朱古力特飲 MOP 39（左）

小新桃味特飲 MOP 39（右）

小白特飲有滿滿忌廉同棉花糖，食落軟綿綿；桃味特飲上的「震震屁股」夠滑溜！

品牌代表之一兼本地靚仔模特兒Jeffrey，都推介朱古力流沙包，覺得有得玩又好食。