資料圖片
雖然職業司機是本澳不能輸入外僱的3個工種之一，但是兩地牌「過界司機」違法駕駛賭場發財巴的問題嚴重，坊間亦一直批評政府打擊過界司機不力。在第2日立法會口頭質詢大會上，直選議員吳國昌質詢當局有關過界司機的問題，引起多名議員輪番爭辯。其中官委議員馮志強愈講愈激動，指本澳旅遊巴不足是不爭的事實，現時的運作沒有傷害到本地職業司機的權益。而兩地運輸可以促進地方經濟，有利民生，「旅遊巴係車啲財主佬嚟澳門嘛，澳門唯一嘅龍頭產業係博彩業，其他就叫行業。產業得一個，你哋係咪想搞死埋呢單嘢先？你哋居心何在？」
他更批評有議員吹毛求疵，「你哋講啲嘢離哂譜，（特別駕照）係有利澳門經濟啊。博彩業全部都靠嗰啲嚟生存，如果你哋搞死哂，全部都唔開飯？坐係度收七萬幾銀啊？傻仔！」又「勸」治安警交通廳「唔好佢哋講就做足，我哋係實事求是，解放思想，啱唔啱啊。」直選議員梁安琪則指，旅遊業促進本澳經濟繁榮，而本澳人力資源實在不足，認為應予以開放。又指港珠澳大橋即將啟用，交通部門應做好規劃。
而直選議員鄭安庭則認為，本澳巨型博企項目眾多，每年招待數千萬旅客，「究竟本澳嘅就業情況如何？司機嘅情況如何？佢哋係真係無嘢做？定係唔願做？或者係無能力做？我諗呢度要有好透明嘅分析，而非有兩三個司機去工聯嘈一嘈，就將呢件事發大嚟講。可能只係得兩三個唔願做嘅司機去講呢件事。」
面對商界議員的批評，勞工界直選議員關翠杏反駁指，今日的質詢題目是司機利用特別駕照違法駕駛的問題，「關咩旅遊發展？關咩事車旅客落嚟？關咩事港珠澳大橋通車？呢啲全部都係風馬牛不相及！大家係殿堂上亂講一通，咁我哋仲有無議事規則？」她強調違法就是違法，政府要依法辦事，「至於商界覺得點，無問題你可以辯論，甚至可以開放全國嘅司機開放嚟澳門，你有本事通得過咪得囉。但係而家講緊嘅係違法駕駛，做乜咁勞氣？做乜要鬧到人哋係為乜嘢利益？唔通立法會有人話要開放旅客來澳，政府就可以唔依法？」
另外，亦有多名議員質疑，2012年前當局已發現特別駕照制度存在問題，為何至今仍未有進行修法？交局駕駛執照處處長謝國漢解釋，特別駕照制度由1984年的法令規範，但至今未頒布補充性行政法規。2012年9月跨部門小組完成行政法規草案。但經法務部門分析，行政法規只規範內地駕駛員在澳駕駛的資格問題，要解決內地司機過界工作，則同時涉及外僱、車輛等規範，仍需深入分析評估，因此暫時未有制訂特別駕駛執照補充行政法規的時間表。