歌壇伯樂孫敬安

    將黎天王“從泥溝裡拉上來”的人：孫敬安，與盧敏儀瓷婚二十周年，筵開六十五席。謝賢、胡楓等老友雲集，曾志偉送出一百二十八枝紅酒……要補一筆，孫敬安曾經在澳門工作五年，賺得第一桶金回港起家的。

    孫敬安網頁自揭，七十年代越戰，大量美軍經香港在灣仔活動，酒吧客似雲來，他與一些業餘Band受聘演出，廣結友好後，來澳門工作五年，搵夠本錢及人脈，再投資食肆酒廊。他現主力做廣告及製作公司。孫敬安愛玩賽車，又做足球班主，“賽車約花了幾十萬。足球最重皮用成千萬，若去炒樓我已發咗。”

    “炒歌星”！不知是否形容恰當。他捧的黎明，當年只是初出道；之後，他又炒熱幾乎無人問津的蔡楓華。據講，“芹菜”二○一一年想開演唱會，“幫佢搵投資者，冇公司肯接。”由於孫敬安也經營娛樂事業，“倒不如自己做”，蝕極都是八十萬左右。沒想到收逾百萬元，以演唱會一般毛利兩三成計，利潤已好好，本來皆大歡喜……但蔡楓華公開抱怨主辦公司賺晒，氣得孫敬安老婆盧敏儀淚灑當場。

    之後，他也有炒熱冷星的故事。賈思樂與露雲娜演唱會，當年傳找不到投資者，孫敬安拍心口接下來，“同蔡楓華不同，今次係投資。佢哋眞係唱得好好，中年歌迷根本冇歌聽，如果關正傑肯復出，實爆。”他坦言不少過氣藝人找他幫忙，“有冇得做，始終要睇時機，好似八両金早排都紅過一陣。”

    疑似歌壇“狙擊手”，專門捉冷炒熱。孫敬安對大律師老婆如何獨具慧眼？“我哋性格相反，我一生浪蕩，好防人，佢就易信人。有個女人哭訴，要借大耳窿付律師費，Money立即開票退錢。”江湖長大的人不太可能規劃理財，婚後理財觀念不變，最緊要花得高興。“全部錢都交給太太，佢只係乖乖地買樓，再儲錢。”

    瓷婚宴會，盧敏儀大爆愛的宣言，“去年驗出有乳癌，老公擔心攬住我喊……後來發現冇問題，老公又攬住我喊。結婚時我講過，愛老公多過愛自己，這二十年來，卻是老公愛我更多……”

    孫敬安祝酒，唱了幾首英文歌。“去年已開始練習了。”盧敏儀甜滋滋踢爆。

    高  梁