政府早前透露，將會在修訂《經屋法》時深入研究經屋申請採計分排序，但因無法維持經屋供應，經屋申請「開完隊」後將不會保留輪候隊伍，引起社會熱議。「澳門論壇」今日探討經屋計分排序制度的議題，有市民認同政府恢復計分排序制度，指2011年政府修改《經屋法》後，將原有的計分排序制改為分組抽籤，令非核心家團及個人申請者上樓的機會近乎零。認為今次政府恢復計分排序，有助經屋分配的科學性及公平性。但認為政府以不能維持供應為由「散隊」則是倒果為因，「輪候有期、上樓有期，令到市民更安心。有輪候期係可以畀到政府更有壓力去覓地增建更多經屋，穩定供應量。」
但亦有意見認為政府不應再興建經屋，有市民稱：「好多後生仔話而家買唔到樓，我唔明囉，2百萬、3百萬嘅樓而家有大把，加上年青人嘅收入有2、3萬一個月，點解會買唔到樓呢？點解要出嚟買1千萬嘅樓？經屋係攞我哋市民嘅錢，去畀需要買樓嘅人，係咪真係咁需要呢？去睇睇而家澳門有幾多屋係空置，特別係經屋，好多都係無人住嘅。呢班人係咪真係咁窮？」另外，亦有市民建議，經屋家團住滿16年以後，要強制將經屋單位轉賣給政府，再由政府轉售予其他合資格經屋申請者，保障公屋資源輪流轉，「否則政府再起1萬間經屋都唔夠。」
地產界葉建華：經屋尤如係全市民荷包攞錢 補貼少數小業主去置業
本身是地產界的公屋事務委員會委員葉建華表示，現時本澳土地資源緊缺，若政府公開拍賣土地，每幅土地的收益就有10多億元，「收益可以點做？可以放落政府庫房，或者可以即時分攤畀市民，全部都有錢收。」形容經屋是由本澳居民的「荷包」中拿錢，補貼數百、數千小業主去置業，「呢個行為如果大家認為係合理嘅，就唔該即刻攞錢出嚟。社會人士如果要推動興建公屋，等於請抽到六合彩嘅人食大餐。經濟學有一個理論，就係花別人嘅錢比花自己嘅錢嚟得慷慨。」
葉建華亦認為，政府只應幫助低收入人士解決居住問題，而不應幫助他們置業，「就好似解決交通問題，要公交優先，唔應該由政府幫市民買私家車或電單車。」
新青協房屋政策關注組召集人陳偉斌則認為，雖然計分排序制比分組抽籤制度更公平，但從現實上來看，現時經屋分配所面對的最大問題就是沒有穩定供應量，「如果好似而家咁，每一次擠千幾二千畀你，無論係計分排序定係抽籤，後邊嗰啲係上唔到就上唔到，無分別，只有前面嘅家團可以上到樓。」又認為要令青年人有機會上樓，不可能單靠制度形式就能改變，「只係有個希望而已。」
街總社會事務委員會副主任何永康認為，社會應反思為何青年人夠18歲就去申請公屋，其實是因樓價太貴買不起、供應量不足等所導致。認為政府應做好具前瞻性的房屋規劃，期望9月份政府所公佈的公屋需求報告，可以從中看到政府興建公屋的時間表及供應量，回復市民信心。