仙杜拉跌傷報平安

    八十歲“鬼馬歌后”仙杜拉跌親，好傷……傳來柔弱聲音，令人擔憂……“歌壇風紀”甄妮呼籲：“溫哥華的行家朋友，快去探探她！”經理人第一時間回應：“仙杜拉對甄妮係嗲啲嘅，老友嘛，而且，佢仲係鬼馬小朋友，會跟甄妮講：‘我好慘呀！’通話時可能眼瞓，聲音柔弱，模模糊糊，便惹來誤會。”經理人強調，仙杜拉除家傭外，還有同屋住雷太，會互相照顧……“我和老友們亦會經常探訪。”

    “多謝關心！”仙杜拉鬼馬報平安：“係隻拖鞋曳曳呀，唔覺意跌親，現在由醫生跟進，好快會好返，多謝晒，記得要笑！哈哈。”

    娛樂圈老化，生老病死的新聞漸多。發生了險死還生的新聞後，仙杜拉話：“自己都唔知，我從來唔睇負面新聞，唔好嘥我時間。人與人之間為乜要互相憎恨。感恩！會很快扔掉煩惱……這般年紀，只想到健康！但樹欲靜而風不息……”

    多年前，仙杜拉左乳生腫瘤，“醫生問我，割咗之後，要唔要裝義乳？我秒回‘割埋另一邊免除後患。’所以，我經常用‘煲冬瓜’對人講：我沒空（胸）。”手術後，馬上掉晒胸圍，仙杜拉鬼馬說：“好記得，當時汪明荃對我講：唔緊要啦，壽包一個，有冇都睇唔到。哈哈，Lisa好惜我，好好玩。 ”仙杜拉當年講完“沒空”故事，問記者要唔要睇吓佢個胸？“好似眼眉咁……”跟着唱兩句：“我一見你就笑，”癌病康復者的仙杜拉，堅持唱到撑唔住為止，暫時無意退休。

    “生則相聚，死也化蝶，幾許所願稱心……”《啼笑因緣》唱到街知巷聞，仙杜拉情史，一直神秘莫測。之前她返港參加演出時，仍有回應傳媒追問的感情問題，“我十六歲開始，已經有好多人追，現在……都唔止一個老外追求。我哋在街上相識，有個老外經常約我……”

    “年輕時，追我者中有醫生、律師、大粒佬，佢哋要求包養我。”八十歲仙杜拉，追憶十八少年風光，“我好直咁講，佢哋目標都係為咗上床，呢方面我好清晰——你估上咗床之後，仲會有你咩？睬你都儍啦。”嚇你一跳是，追求者中，她最激賞四哥（謝賢）最有風度，“佢暗示過，但被我拒絕後，仍繼續追求，佢係愛情君子，我好尊敬佢。”

    高  梁