做教練要有腦袋
四強荷蘭將大戰阿根廷,我就唔太睇好阿根廷。教練可以話係一隊球隊嘅靈魂,點樣令到班球員服你又願意為你賣命,係一件好難做到嘅事,仲要啲球星肯乖乖聽你話之餘,唔會畀球員大過球隊,咁當然自己本身都要有腦袋啦。就好似我愛隊曼聯咁,費格遜時代同莫耶斯時期差咁遠,明明同一班人同一班波底,仲要多咗個費蘭尼,只係換咗領隊就由第一跌到第七。其實我講咁多嘢又係想讚雲戈爾,同埋帶出教練對一支球隊嘅重要性。如果個教練係冇腦嘅,班球員幾叻都冇用。
球員不能大過球隊
我唔係話阿根廷個教練冇腦,但我覺得球員大過球隊係對球隊唔健康。當然每支球隊都需要有老大哥,但美斯畀我嘅感覺係已超越咗老大哥,係球隊冇咗佢唔得。作為曼迷,我又要講吓曼聯啦,就好似當年費格遜同碧咸嘅飛缽事件咁,因為費格遜覺得碧咸已視自己大過球會,同埋碧咸係有唔聽費Sir話,結果費爵爺就有理冇理成對缽飛過去。雖然當年係鬧翻咗,但事隔多年碧咸仍對費格遜好敬重。
由此可見,每個球員都無可能大得過球隊,就好似阿根廷冇咗美斯唔得一樣。如果美斯嗰日好似尼馬咁傷咗,又或者狀態唔好,成隊波就要講拜拜。
留言