阿荷合踢眼瞓波
巴西對德國入球多又刺激,阿根廷與荷蘭的四強大戰就零入球,踢了百二分鐘悶戰。作為球迷的我是極討厭睇這些眼瞓波,特別是凌晨四點開波,而且睇完跟住仲要返工。今場兩隊都踢得保守,最終我支持的荷蘭出局。互射十二碼階段,荷蘭已用盡所有換人名額,冇得好似上場咁換後備門將添古爾救十二碼,最後阿根廷贏四比二晉級決賽。相信德國在決賽時會為我喜歡的教練雲戈爾報仇。不過邊度跌低就喺邊度起返身,下屆再來過。其實荷蘭今屆人腳唔算好好,下屆再準備好啲(我上屆都係咁安慰班英格蘭球迷,嘻嘻)。
今場兩隊都主要以穩為先,賽前焦點美斯、雲佩斯、洛賓就踢得一般,交唔到功課。雲戈爾同沙比拿都好小心,兩隊用防守戰術。上半場荷蘭的迪莊同阿根廷的馬斯卓蘭奴搏到盡,一班前鋒完全做唔到嘢。迪莊全場睇實美斯,令美斯全場只有一次射門,而且是罰球。
睇防守學到嘢
下半場兩隊仍然保守,場波節奏好慢,眼瞓到呢……八十一分鐘,阿根廷連換兩個攻擊球員,柏拉斯奧同阿古路落咗場,都係食白果要加時。話說昨朝有個前輩教我,荷蘭今場係用盯人防守,阿根廷用區域防守。我起初聽唔明,返到公司諗諗下,原來係話美斯一過半場,荷蘭就會跟實佢;相反洛賓走來走去,所以就要用區域性去Mark佢。又上了一課。
留言