昔日輝煌 現今客荒

    後生唔玩 老友記撐

    在資訊尚未如今天發達的六、七、八十年代，澳門賽狗盛極一時，不單為澳門的電台、報紙主力之一，還養起多份香港小報。隨着賽馬興起，賽狗九十年代開始式微，現時每晚十八場、每周賽五晚，每晚總投注額約二百至三百萬元，可謂雞肋，狗迷一談起賽狗去向就嘆聲連連：食之無味，棄之可惜。矛頭直指經營不善。

    遊客只玩雞仔注

    賽狗雖說亞洲獨有、澳門傳統特色，但場內暮氣沉沉，除了在一些遊客中見到年青臉孔外，舉目都是五、六十歲或以上的狗迷，後生一點都起碼四十幾。昨日周六本應旺場，但目察只有三百人左右，幾乎都係“吉位”。

    資深狗迷陳先生嘆道，現在狗場投注以本地人為主，彩池細、玩法單調，都是細注客。遊客睇就開心，但投注少且都是“雞仔注”，求個體驗居多。他認為，賽狗有一定特色，不過經營者多年似愛理不理，設施十年如一日，好殘舊，最離譜是在場中央的電算機去年五月壞掉，至今都未修妥。另外，看台、投注櫃台又舊，通道又無冷氣，洗手間奇臭無比，“呢啲唔似係經營者應有態度。” 取消狗場好可惜，保留又搵唔到出路。

    狗迷大彈設備殘

    有一定年紀的狗迷，喜歡在賽事日三兩知己坐埋一邊，評頭品足。楊先生說，賽狗是澳門特色，但搞得差，對他們來說，現在可有可無，有就繼續吹水、拗頸，打發日子，好過入賭場。以前賽事日好旺場，無得坐要企，點似現在空空如也。成班老友記一講起狗場去留，笑罵不停，抱怨經營不善，不但無宣傳，彩池太細無肉食，最差係設施經常壞，“走去‘打飛’，部機成日壞，又唔理。我哋唔鬧佢，咪仲好啦，慳返啲！”更甚者，現賭狗無晒規則、程序，乜都得，又從來唔就客人，梗係死吓死吓，“真係冇晒意見”。

    老麥評狗出晒名

    黃先生自小愛上賽狗，仍然懷念聽收音機的賽狗音樂、麥氏的評論，堅決支持澳門保留賽狗，至少比去賭場好，起碼有隻狗睇吓。現在賽狗的問題是經營不善，董事、行政人員名單就夠多夠響，有邊個理過？連投注櫃位都很少，想“打飛”都唔得，點賭？政府應該重新開標競投賽狗牌，加強監管，“自己有錢都一定會去投標”，只要賽狗搞得有聲有色，何愁難吸引客人。

    本報記者