【專訪】勞資雙方就最低工資立法存有不同取態,當中對於低收入僱員的問題如何解決?來自商界的立法議員馮志強認為,應由政府透過現行工資補貼方法,或從福利概念給予資助。但來自勞工界的立法議員關翠杏強調,不要混淆概念,最低工資是設定一種社會保障線,但不是社會福利,更加不是社會救濟。
立法會昨日繼續一般性討論政府提案的《物業管理範疇的清潔及保安僱員的最低工資》法案,勞資雙方所持觀點及概念不同,其中,馮志強和關翠杏有較長發言的辯論。
馮志強首先發言中指出,政府要制定最低工資政策,通過法律形式作規管的,是否應該要結合本地嘅實際情況去考慮呢?「制度同法律係要保障全社會廣大市民的利益,我就不認同政府制定法律只係保障某個階層,或者某個工種,呢個政策一開綠燈,就無時無刻都會頭痛嘅。」他質疑隨著生活指數高企,每年都上升百分之五至六個百分點,許多工種都貼近最低維生指數,「係咪樣樣都要提出來要保障呢?如果只是有良好的主觀願望,卻脫離實際嘅,我諗好難會辦得好,亦會搞到亂曬籠。」
他又指出,有些大廈管理公司是三十年不變,「八十年代的管理公司,例如八十年代建的公屋,到今日的管理費都無改變。佢地仍然維持每個月的管理費都係二百四十文一個月。而大廈管理員嘅待遇,係十二個鐘頭每個月得三千多四千文,換句話呢,係五千文唔夠。」但如果政府要提升三十元一個鐘,那豈不是小業主要一個月付出五百幾元?「而家住係經屋呢一群都係僅僅可以生活到,你而家突然間話升近一倍嘅管理費,我認個個都會有好大意見。」其後又質問政府代表:「你明知呢班係窮鬼,你重要佢地百上加斤,又情何以堪呢?」
馮志強認為,大廈管理員的薪酬待遇真係低。「如果你咁加呢,我諗經屋人士都係嘈。對於草根階層交管理費一定有問題。政府一定要深思熟慮,唔係叫大學整份報告就用來執行,咁真係死得人多。」又說,「管理員都有好多等級,資深啲嘅都多二百,後生的又貴的,六七十歲個的,宋碧琪話齋,瞓係到煲飯食㗎咋。六七十歲坐係到發吽竇個啲你都畀六千幾佢,咁做得個啲係咪要畀七八千啊?如果加個管理費,係咪加一倍都唔夠啊?」
他認為應由政府透過現行工資補貼方法給予大廈管理員的收入資助,「點解政府對呢啲又咁吝嗇,對其他又咁大手大腳呢?」他強調社會福利保障係政府嘅責任。又指,如果為清潔及保安員設定了最低工資後,跟著其他行業就出現工資互相攀比情況,「有的嘢係唔郁嘅靜止狀態,你就唔好搞佢啦,好心就做壞事啊,司長。原本我都唔想多講,任何一個社會都有最低收入階層,就好似罪惡咁,無辦法消滅。政府可以點做呢?搞多的福利畀佢地囉。」
其後發言的關翠杏對於有議員認為在大廈管理等的法律法規未完善,不是實驗最低適當的時機的觀點就指出,這理應要在大廈管理制度完善方面做事,又會涉及大廈管理員工資嘅問題?「係咪呢的大廈公司一日唔完善,物業管理嘅雇員嘅收入就唔能提升呢?呢個觀點角度係好有問題。」
他表示,現在為最低工資立法的時機是絕對成熟。第一,澳門經濟亮麗,十年來GDP不斷增長,帶動了全澳門的樓價、物價,即使現在舊式的經屋,身價升幅又何止十倍呢?在這樣的環境下,為何管理員工的工資都沒有增長呢?「樓價物價是全澳門一齊升,唔通大廈管理員嘅樓價就不會升,買嘅餸就唔會貴咩?佢嘅生活成本點捱呢?」她又回應馮志強說:「馮生頭先都講到好坦白,畢竟係呢個行業嘅專家。所以,你講到(大廈管理員)五千文十二個鐘,呢個係真嘅。大家都諗下,易地而處啊,五千文每日十二個鐘,點生活啊?澳門嘅中位數工資一萬五千文,而家呢的人做十二個鐘,得五千文唔夠。社會一直講要關心弱勢群體,我地不斷催促政府檢討最低維生指數,今日剛剛升到三千八,做十二個鐘僱員五千文個種,我地係咪鼓勵大家唔做嘢,向政府攞救濟呢?」
關翠杏指出,弱勢就業群體是否需要幫助呢?這個是社會公義的問題。而大廈管理員係自食其力,不想依靠政府救濟。「我明白要加管理費,作為小業主會增加承擔,但唔係所有小業主都唔願意增加有關的管理費,佢同管理質素應該分開兩件事。大家唔好淨係攞的特例嘅老人家啊,煮飯啊咩,我覺得這些未有最低工資已經存在的事,如果業主會不接受,管理公司不接受,我諗佢地都唔會坐得係個到。」
她申明勞工界的立場,「工資係我提供了服務,換取薪酬代價嘅一種回報。最低工資係一種保障,但唔係社會福利,如果要講社會福利嘅,就不如唔好做,向政府申請最低維生指數。工資就係靠佢嘅時間,勞力,去換取工作收入。大家唔能夠去社會福利來睇呢件事。如果用社會福利,譚司長倒不如返去畀政府一個建議,所有認為自己畀唔起最低工資,或者不能夠依法提升工資嘅樓宇,政府不如全部收返來黎啦,無管理公司做嘅,政府搵一間社企做咗佢。」
關翠杏强調不要將一些概念混淆。也不要負面評價那些勤勤懇懇、每天工作十幾個鐘嘅人,「佢係有付出㗎。」她說:「澳門今日的社會,人人都有咁高工資,萬幾文都生活唔到,咁點解我地唔睇下的咁淒涼嘅人呢?最低工資係社會的保障線,但不是社會福利,更加不是社會救濟。」
對於有議員提出只在這兩個工種施行最低工資將會產生很多問題,包括住某些大廈嘅人都是低收入群體,他們最低工資都得不到保障。關翠杏指出,這個問題其實好簡單,「嘅然在議會已經有一個咁樣嘅共識,亦即係我地都覺得最低工資應該普及全澳門。所以,如果大家同意,可以改(法案),重未遲,刪咗物業管理,變成全澳最低工資囉。只要大家都係咁想就得啦。」◇
留言