政研室：澳門人口密度同94年一樣

政研室：澳門人口密度同94年一樣
【口水會】澳門承載力爆燈，人口密度屢創新高，目前每平方公里已多達2,0500人。政研室主任劉本立竟指其實唔算好高，現時人口密度與1994年一樣，澳門市民覺得迫，只係因為遊客多左。又指現時17萬外僱，住在澳門只有11萬。自從延長通關措施推出，越來越多外僱不住在澳門，一定程度上減輕澳門的居住壓力。
間選議員林香生質疑政研室的數據「水份多」、不可信。他指出，人資辦2013年批出5.5萬名建築業勞工，2014年有8.8萬，今年首季有1.3萬，但至今建築業勞工卻不足5萬人。「批咗額黎咗一半都唔到，咁點樣研究？我真係無辦法研究落去！」
劉本立又長篇大論解釋，澳門進入經濟新常態，又要配合國家戰略「一帶一路」云云，做左兩年、原本已經七七八八既人口政策研究要根據最新變化再調整。因為研究室用「負責任」、「嚴謹」的態度做這份報告，「所以遲左一啲啲」。劉本立又喊冤，政研室唔係主觀上要某一年某一月要達到幾多人，而是研究人口變化規律，做過科學的預測模型，希望政府未雨綢繆。
提起口頭質詢的間選議員李靜儀並不賣帳，直指「其實今日見到只得你黎，我都知道無乜答案，你肯定又話我淨係負責研究，政策又唔係我定，我根本限唔到」、「經濟發展既嘢一日唔同一日，你要調整到幾時？」
她批評政府在外僱數量上沒有規劃，每年平均增加約3萬人，對澳門住屋、交通需求造成嚴重負荷。她說︰「特首講過2020年澳門人口去到71萬人，這已經遠超過澳門環境承載力。人口又唔控制，外勞又唔控制，旅客又唔控制，堆填區堆到山咁高，自然資源不可能無限擴張。」