今次內港在「少風少雨」的情況下出現大面積水浸，中區社諮委陳桂舜坦言，水浸的「原兇」其實就是每逢夏季都會出現的天文大潮，屬正常的天文現象。他指出，上週末至本週初期間，本澳普遍吹東風，加上前山河流域水位上漲，影響到內港一帶出現水浸情況。而按照海事及水務局出版的《潮汐表》顯示，週日（15日）的最高潮位是3.11米，而同樣的潮高會在8月12日再次出現，意味著下個月內港可能會面對著同樣的問題，「其實澳門每年都會有四個月時間面對天文大潮，唔係咩新鮮事物。」
陳桂舜亦指，幸運的是，今次的天文大潮與熱帶風暴「山神」影響本澳的日子相差了兩三日，若果天文大潮與打風同時發生，本澳就有可能再度受如「黑格比」、「天鴿」級數的風暴潮侵襲。
內港長年淤積成島 陳：澳珠兩地應合作做好清淤
今次水浸的成因，陳桂舜認為，除了與天文大潮有關外，亦與水域清淤工作有關。他指出，治水的概念離不開二個部分，第一是引流，即將潮水引走；第二就是要與水對抗，如興建堤防、堤壩等。反觀本澳近年由於附近不斷填海，航道收窄，導致疏水能力變差。據政府的海港圖顯示，內港5號碼頭對開水面，經已淤積成兩個小島，水深只有0.1米，在潮退時就會露出來，「天鴿」後更有一艘沉船長期棄置在該處。
他亦指，同樣面對著天文大潮、水浸等情況，珠澳兩地的應對措施顯然不同，「內港會水浸，其實追溯到上世紀50年代就已經有，而澳門水浸嘅同時，當年灣仔嘅花田以及橫琴沖積地嘅農田都全部浸哂。反觀而家灣仔同橫琴嘅堤高比本澳仲要高。呢個就係區域合作嘅問題，佢哋加高堤圍，我哋又有否同時做對應嘅工作？」
「點解咁多年嚟我哋都做唔好清淤嘅工作？」陳桂舜認為，清淤工作並非單靠本澳獨力支撐，特區政府應要與珠海市政府合作，或由兩地政府出資，並由專業的團隊定時做好清淤工作，「其實清淤唔係啲好複雜嘅工作，二千幾年前秦國就已經係都江堰水利工程做呢個工作，冬天潮退時挖深河道清淤，並且興建防洪堤。其實要治水係唔需要外借咩力量，只要向二千年前嘅祖先學習，就已經可以治好水，呢個並唔係咩新科技。」
除了清淤之外，陳桂舜亦認為，當局亦應透過區域合作，做好水道引流的工作。他指出，珠海灣仔與橫琴之間的夾馬口水道，本身是肩負著西江與前山河的流向調整，但是經過連年填海，水道經已收窄，抗洪能力變差，能否再發揮到對流的工作成疑。但他指，由於夾馬口水道位處珠海的水域當中，非本澳可能獨自管理的事，應要透過區域合作機制與廣東省政府進行協調，要多管齊下才能有效治水。
回歸到本澳的情況，陳桂舜指，民署的十三個雨水泵房至為關鍵，可以將市區收集到的雨水儲存起來，並在水位下降時再排出。但他亦指，由於長年的潮汐漲退，已經導致內港一帶不少渠網被沖散，當出現天文大潮時，渠口就有如噴泉般反湧海水。而內港一帶的馬路經常出現破損，加上不少內港的商戶亦投訴他們的地下排水渠經常出現損壞，亦印證內港下水道經已受損，「問題就係呢度，政府有無做好維修嘅工作？有無應對嘅措施？」
當「天鴿」再來 要如何應對？
雖然今次水浸的成因與風暴潮未必有很直接的關係，但是卻引起附近居民憂慮，一旦再次出現有如「天鴿」般的風暴潮，居民要如何應對？陳桂舜認為，其實今次水浸，正正為政府提供一個很好的機會去演練面對風暴潮的應對措施，「究竟我哋有無做好準備工作？治安警話喺天眼上邊安裝喇叭，但我見唔到佢哋係今次有用到。而今次事件中，有無啟動到民防預警機制？其實我哋根本知道邊區會水浸，但有無提前做好封路工作？係今次事件上，無論係市民還是我嘅角度，我都見唔到有呢啲預案嘅機制。」
他指出，「天鴿」過後，其實部分政府部門已經審視了自身不足來作準備，例如民署買了多把電鋸、治安警添置了橡皮艇等救生設施。但他認為，防災是需要完整的套路，「經歷咗上一次『水晶魚』防災演習後，後續仲有啲乜嘢跟進工作？起碼係居民層面，我見唔到有好清晰嘅工作。政府係災後增加咗避難場所，但居民知唔知道就近嘅避難場所喺邊？我都睇唔到有清晰嘅宣傳。」
「風季已經來臨，其實我哋好幸運，以往風季係4至5月就已經開始，但我哋去到7月中先再掛風球。喺今次事件入邊，我哋係咪應該要清楚咁話畀市民知要點防災？有乜準備預案？去到0.5米嘅水浸，究竟要封邊條街？撤邊度嘅居民？當局係有必要將方案話畀大家知。」
陳桂舜強調，當局首要做足所有短期的應對措施，而中長期的措施則要一步步排下去，甚至透過區域合作來達成，「我唔覺得居民會要求所有嘢都要一步到位，但喺嗰一刻，居民係唔係見到有實際嘅嘢出到嚟？例如當日水浸，居民話見唔到有橡皮艇出沒，其實喺嗰一刻就可以攞出嚟演練，0.5米水深話高唔高，但已經係一個好好嘅演練機會。呢一類演練工作要多做，先可以給予居民一個安心嘅感覺。」